إحنَّا زِهقنا شعر/محمود العزب

إحنَّا زِهقنا
شعر/محمود العزب

ياعم احنَّا زِهقنا خلاص
وماعاد فيه قُدَّامنا مناص
من أزماتنا الخَنقَهْ حياتنا
واعمل حاجهْ عشان الناس

واعمِل معروف واسأل فينا
وماتضحَّكش الخلق علينا
وخَلِّينا نعيش قبل مماتنا
وعامِلنا بحُب وإخلاص.

٢١/١/٢٠١٨

إحتمال شعر/محمود العزب

إحتمال
شعر/محمود العزب

إحتمال نقدر نعيش
من غير سؤال
واحتمال ان احنا
مانقول يوم محال
إننا نغير فى حالنا
اللى مال
وان نعرف نمحى بإيدينا احتلال
وحل بعقولنا وخلا آمالنا ف هزال
وكل حاجه تبان عويصه نحلها
ونبقى قد الإحتمالات كلها
إحتمال .

17/1/2020

اى حاجه شعر/محمودالعزب

اى حاجه
شعر/محمودالعزب

اى حاجه ف اى حته ف اى عام
وامتى هانبقى تمام
ونلقى عيشيتنا جميله
والحياه مش مستحيله
ويا حبة ناس لئام

واحنا ليه دايما فى محنه
وعمرنا ماف يوم فرحنا
وكل أحلامنا هزيله
والهموم على طول طويله
وجسمنا خد ع الالام .

13/1/2020

يعنى إيه شعر/محمود العزب

يعنى إيه
شعر/محمود العزب

يعنى إيه نفضل كده
متبرمجين بالشكل ده
ونبقى لمماتنا فدا

ونلقى آمالنا ف عيالنا
عمرها ماجت فى بالنا
واتشمتوا فينا العدا

والحياه ماتكون جميله
وتبقى صعبه ف ناس هزيله
وطول عمرها متهدده .

9/1/2020

بعد الشر عن السامعين شعر/محمود العزب

بعد الشر عن السامعين
شعر/محمود العزب

طب احنا بقينا ف عشرين
وعشنا معاك بالضالين
وبنتمنى ف يوم نتهنى
وتفهم إننا بنى آدمين

وعاوزين تبقى حياتنا جميله
وعمر نفوسنا ماتبقى ذليله
واحنا فضلنا كتير نستنى
وودان طين والتانيه عجين

واحنا لنا فى الحب بقيه
ونفسنا تبقى العيشه هنيه
وانت تبطل كده تفقعنا
بعد شر عن السامعين .

1/1/2020

إيه الحل شعر/محمود العزب

إيه الحل
شعر/محمود العزب

طب قول لنا تقصد إيه
وانت إللى الحق عليه
ولاحنيه معاك لاقيناها
ولاأمنيه معاك طولناها
وانت بتعمل فينا كده ليه

وإيه الحل ف كرهك لينا
وانت ماحسيت عمرك بينا
ولاأفراح وياك شفناها
وسنين مرت وماعشناها
وحبك عمره ماحسينا بيه .

26/12/2019

كل عام شعر/محمود العزب

كل عام
شعر/محمود العزب

كل عام واحنا تمام
مش كسالى أو نيام
واحنا عارفين فين صالحنا
واحنا بنحقق طموحنا
بالمحبه والوئام

وكل عام واحنا بخير
وكلنا عنده ضمير
إنه تتداوى جروحنا
والحياه تزهزه فى روحنا
ونبقى مش عايشين كلام

وكل عام واحنا فى وحده
وكلنا بعزيمه واحده
والعقول فايقه وناصحه
والسعاده تبقى واضحه
واحنا فى هناوه وسلام .

25/12/2019

على عينى شعر/محمود العزب

على عينى
شعر/محمود العزب

على عينى ياحبة عينى
وانت اللى فاجئتنى ف حنينى
وفوقتنى اكتر مانى فايقه
ومالقيت فيه عاشق ولا عاشقه
ولقيتنى باحب عدوينى

واللى ماأثر فيهم حاجه
ولابصولى وانا محتاجه
ولاخلونى ابات يوم رايقه
وانام واصحى وانا متدايقه
واتحسر على كل سنينى .

20/12/2019

ياملوعنى شعر/محمود العزب

ياملوعنى
شعر/محمود العزب

فكرك يعنى ياملوعنى
ان هاتقدر يوم تمنعنى
عن انى اشغل تفكيرى
فى اللى عملته عشان تغييرى
واخليك كده بتجوعنى
وتحتلنى غصب عن عينى
وتكرهنى فى حب سنينى
وعقلى يجيبنى ويودينى
ويعرفنى ليه معادينى
وليه من يومها بتخدعنى .

19/12/2019

شوف ياحبيبى شعر/محمود العزب

شوف ياحبيبى
شعر/محمود العزب

شوف ياحبيبى
إنت واخدنى كده على عيبى
وماحاولتش مره تصلحنى
ولاتسعدنى ولاتفرحنى
ومش متأثر من تعذيبى

وماشفتش وياك يوم راحه
وانت تاعبنى معاك بصراحه
وماعشتش فى هواك مرتاحه
ومفضى لى على طول جيبى .

18/12/2019

أى كلام شعر/محمودالعزب

أى كلام
شعر/محمودالعزب

طب مين بس ال اى كلام
واحنا ف عينك نطلع كام
واحنا بعون الله مش عونك
نقدر برضه نعيش من دونك
لو مااتصلحتش بسلام

واحنا معانا والا مافيش
بنعيش ونبان كالدراويش
وﻻقهرنا خلانا مانعيش
ولاعمرنا بنهاب تهويش
ولابنخاف من اى كلام .

17/12/2019

يامعلم شعر/محمود العزب

يامعلم
شعر/محمود العزب

يامعلم علمت علينا
ومش عايزينك تسأل فينا
ولاحتى تحقق آمانينا
ولاتاخد غلطه بأيادينا

وانت من يومك يامعلم
بتعمل فينا أعمال بتعلم
وعلى حالنا بتبان متألم
ووجودك بينا بيكفينا .

16/12/2019

يااللى شعر/محمودالعزب

يااللى
شعر/محمودالعزب

يااللى مصدر لينا الطارشه
ومخلينا عايشين نتمشى
على أمانينا
واعز مالينا
وبتنشنا باعوجها منشه
وبتتفرج على بلاوينا
ولاقلبك بان عمره علينا
ولابيهمك هدك فينا
احنا مش لاقيين نتعشى .

15/12/2019

حبة دم شعر/محمود العزب

حبة دم
شعر/محمود العزب

ماتخلى عندك حبة دم
وتبقى بنا يابخيل مهتم
وتلبى لنا بسرعه حاجاتنا
وتحس بنا وبمعاناتنا
والا انت ناوى ماتهتم
وعمال بتنسيينا أسامينا
وقساوتك بتسيبها علينا
وهمومنا باينه على عنينا
واحنا أساسا إستكفينا
وعيشيتنا معاك هم الهم .

10/12/2019

ياأغلى إسم شعر/محمود العزب

ياأغلى إسم
شعر/محمود العزب

لا يتوفر وصف للصورة.

وحياة ربنا المعبود
ياأغلى إسم فى الوجود
مازلت واقف على بابك
وباتمنى اكون من أحبابك
علشان اكون بهواك مسنود

وأعيش معاك منفوش الريش
سوى ويايا والا مافيش
وطول عمرى مش قد غيابك
ولاباطيق بعد جنابك
وكل غيبه وليها حدود.

8/12/2019

مع إنى شعر/محمود العزب

مع إنى
شعر/محمود العزب

مع إنى بااهواكى لكنى
بااكرهنى لو بعدوك عنى
وبااحمل نفسى فوق طاقتى
وبااسيب الأوهام تقتلنى

وبادعى لك عمرك ماتطيرى
من إيدى ولاتروحى لغيرى
ولااشوفك منى اتغيرتى
ولا تسيبى القهر يجننى .

3/12/2019

بصى ياامه شعر/محمود العزب

بصى ياامه
شعر/محمود العزب

بصى يااغلى ماعندى
واللى كل الدنيا ليا
الحقينى وخلى ودى
والمحبه هيه هيه
واما انده لك تردى
وتنجدينى م اللى فيا
وانت احلى الناس وسندى
وانت طووول عمرك بهيه 

2/12/2019

خليك فاكره شعر/محمود العزب

خليك فاكره
شعر/محمود العزب

خليك فاكره جدا جدا
إن انا حبيتك فعلا
ووهبتك كل مشاعرى
يانجمى وشمسى وقمرى
والوقتى سايبانى أدن

وعلى قد ماباقدر باحزن
ومافيش عيشه بقت معدن
وباعيش مع نفسى بقهرى
مع إنك آخرة صبرى
وكان ودى ف ودك أحسن

وبعادك بقى بهنالك
ولاحبك بييجى على بالك
وانت حبيبتى طول عمرى
وعشيقتى كده من صغرى
لو لفيت الدنيا دى سبعا .

1/12/2019

إنتم قله شعر/محمود العزب

إنتم قله
شعر/محمود العزب

إنتم قله واحنا الكتره
وهانعرفكوا قيمتكم بكره
وهانوريكم ونخليكم
تعرفوا مين إللى بكلمكم
واللى كلامه بخليكوا بكم
ووقت مابيحب بيشكمكم
وبيجعلكم من غير ذكرى
وانتم مين علشان تهينونا
ونلعن ميتين اللى جابونا
وتغسلوا ف عقولنا وتكوونا
واحنا فى عصر جميل ومزهزه
ولاعاد حد خلاص بيتهته
وانتوا اللى بتنسوا على فكره.

21/11/2019

خيبت أملى شعر/محمود العزب

خيبت أملى
شعر/محمود العزب

خيبت أملى فيك
وبادعى بحرقه عليك
يااللى انت فى بالى

يامدمرنى بإيديك
وبتزغرلى بعينيك
وبتقول لى وانا مالى

وانت سبب فقرنا
وعيشيتنا على قهرنا
وناسينا طوالى

ولاشفنا منك خير
ولاصونتنا بضمير
وبايعنى بعيالى .

20/11/2019

بتستهبل شعر/محمود العزب

بتستهبل
شعر/محمود العزب

طول ماانت عبيط وبتستهبل
هااصحى لك وف نومى هاافنجل
ولاهااسمح تانى أتنيل
وهاأقاومك علشانك عيل

وانا نفسى ألقى يوم راحه
وابقى من الناس المرتاحه
ولا حد يبص لى بوقاحه
ولامخلوق من أصلى يقلل

وعشان كده قررت استرجل
والعقبه مسيرها هااتذلل
وانا من يومها معاك باستحمل
وهااعيدحساباتى من الأول

19/11/2019

يابارد شعر/محمود العزب

يابارد
شعر/محمود العزب

القمقم مستنى المارد
يتحرك وصاحبنا معاند
وبيعمل فينا اللى مايعمل
وبيخنق أمانينا واتدلل
وبيقول لنا وارد

وطول ماهى خيبتكم دى ف بيتكم
وانا شايف العيبه عيبتكم
أنا هاافضل منكم متحلل
ولاعمرى من هنا هااتقلقل
وهابان لكوا فاقد

وهاأتنطط على قد ماهاأقدر
طول ماانتم حالكم متأخر
وهااخلينى كده متعطل
وان واحد فيكم قال دا اهطل
هاأقول له يابارد .

18/11/2019

متشكرين شعر/محمود العزب

متشكرين
شعر/محمود العزب

متشكرين على العمر
إللى ضيعته معاكوا
وع العيشه المره
إللى عيشتوها بهواكوا
وع الأفلام وع الأوهام
وعلى كل إللى جاكوا

وانتوا اللى انا كنت
من فتره عايزكوا
وساكتين خالص
ولاتفتحوا بوزكوا
وموافقين طول الأيام
على لعبى وياكوا .

17/11/2019

أنا متأسف شعر/محمود العزب

أنا متأسف
شعر/محمود العزب

أنامتأسف جدا جدا
وعمرى ماهااعمل
كده من تانى

وانامش ممكن
اخونكم أبدا
ولااسيب اللى يعانى يعانى

وأناأوعدكم اكون للأحسن
والقى الدنيا
معاكوا سايعانى

وهازيل بينا أى عداوه
وكل إللى يشوفنى
هايلقانى

بااعمل لصالحكم بهداوه
وبإخلاص
وبكل تفانى .

16/11/2019

إنت مصدق شعر/محمود العزب

إنت مصدق
شعر/محمود العزب

إنت مصدق روحك اياك
إن هااعيش
على كده وياك
وانت تاعبنى
سنين فى هواك

ولافيك ميزه هاابكى عليها
وبص لحيرتى
اللى انت راعيها
وانا مش ممكن
تانى هااهواك

وانا قررت
تغور من وشى
وانا مش هاامشى
انت اللى هاتمشى
وهااكسر أكبر قله وراك .

15/11/2019

ياعويل شعر/محمود العزب

ياعويل
شعر/محمود العزب

إنت مسيطر
والا مخدر
والا قضاء الله ومقدر
وبتعمل اللى بيحلالك
وعيالنا مش عايشه قبالك
ومش عاوز ابدا تتغير
وانت على طول
خارب بيتنا
وعمر ماهمك
إيه اللى حيليتنا
وعمال فينا
ياعويل بتدمر.

14/11/2019

أنا آسفه شعر/محمود العزب

أنا آسفه
شعر/محمود العزب

حبيتك غصب عن عينى
ولقيتك دايما ياناسينى
ياكارهنى وعلى طول معادينى
ومافيش أى كلام يتقال
غير إن العيشه بينا محال
وانا آسفه على كل حنينى
وع اليوم اللى انا شفتك فيه
وعلى صبرى اللى اناعشت عليه
وعلى قهرى من كل سنينى .

13/11/2019

أنا قادره شعر/محمود العزب

أنا قادره
شعر/محمود العزب

طب إيه المانع
إن انت تختشى على دمك
وتغور من وشى ولاأصحى
والاقيك ولا همك
وبتخدر أعصابى أونطه
وماارتاح من ألمك
ووجودك فى حياتى كان غلطه
وانا قادره اقاومك .

12/11/2019

حسن الختام شعر/محمود العزب

حسن الختام شعر/محمود العزب

حسن الختام
شعر/محمود العزب

ياعم يابتاع الكلام
احنا اللى سكنا الآلام
ولاشفنا منك غير وعود
وجحود وخنقه على الدوام

ولاعدنا هانصهين عليك
وآمالنا ضاعت بين إيديك
وكل شئ وله حدود
وانت كده حسن الختام .

11/11/2019

معاك للآخر شعر/محمود العزب

معاك للآخر شعر/محمود العزب

معاك للآخر
شعر/محمود العزب

إتطمنت عليك ع الآخر
وكل مااقابل حد اتقاخر
إن انا وانت بخير ياحبيبتى
وعايشين على قناعتنا انا وانت
إن مافيش غيركده م الآخر

والأحلام مابنزهق منها
واهويمكن ييجى يوم ونولها
وباصدق وانت بتنبسطى
وانا من طيبتى
معاك للآخر

9/11/2019